Սովորաբար սառույցի համար նախատեսված ձևամանները մենք օգտագործում ենք միայն իրենց բուն` նախատեսված նպատակով` սառույցներ ենք ստանում տարբեր հեղուկներ սառեցնելու համար: Բայց չէ՞ որ կարելի է մի փոքր շարժել երևակայությունը և այդ ձևամաններն այլ նպատակով օգտագործել: Ո՞վ է ասել, որ դրա մեջ միայն ջուր կարող ենք սառեցնել: Ոչ ոք: Դե ուրեմն ավելի համարձակ 🙂
1. Սառեցրած գինի
Գինին խորհուրդ է տրվում օգտագործելուց առաջ սառեցնել, բայց սառույցի չվերածել: Բայց եթե խնջույքից հետո շշում մի քիչ գինի ավելանա, մի՛ շտապեք այն թափել, լցրեք սառույցի ձևամանների մեջ ու գինու սառցակտորներ ստացեք, որոնք հետագայում կարող եք օգտագործել գինով պատրաստվող բաղադրատոմսերի մեջ:
2. Սուրճ
Ամռան շոգին ավելի լավ ու թարմացնող բան չկա, քան սառույցով սուրճը: Բայց բոլորս էլ գիտենք, որ սառույցը հալչելով նոսրացնում է սուրճը ու փոխում համը: Դրա համար սառցախցիկում ունեցեք սուրճից սառույցի կտորներ, որոնք և՛ կսառեցնեն ձեր սուրճը, և՛ կպահպանեն դրա համը:
3. Սմուզի
Սմուզին ինքն իրենով արդեն հրաշալի բան է: Իսկ սառեցրած վիճակում այն կարող է ծառայել որպես յուրօրինակ պաղպաղակ կամ քաղցրեղենի տեսակ: Բայց այս դեպքում օգտագործեք սառույց պատրաստելու սիլիկոնե ձևամաններ:
4. Շոկոլադ իր հավելումներով
Չկա մի մարդ, ով փոքր տարիքում չի երազել սեփական շոկոլադի ֆաբրիկան ունենալ, իսկ ի՞նչն է հիմա ձեզ խանգարում իրականացնել մանկության այդ հրաշալի երազանքը: Հալեցրած շոկոլադը լցրեք սառույցի ամանի մեջ, ավելացրեք ձեր ցանկացած հատապտուղները, մրգերի կտորները, ընդեղենը, չորամրգերը և սառեցրեք:
Կամ էլ կարող եք դառը շոկոլադը սառեցնել, հետո այն վայելել կաթի հետ։
5. Խորանարդիկներ կոկտեյլների համար
Համեղ կոկտեյլներ ստանալու համար սառցարանում պատրաստի սառեցրած խորանարդիկներ ունեցեք: Օրինակ` կարող եք սառեցրած անանուխի տերևներ ունենալ:
