Չեբուրեկի

Բաղադրիչներ

• ալյուր — 3 բաժակ (1 բաժակը՝ 250 գր)
• ջուր — 300-350 մլ
• կարագ — 125 գր
• միս տավարի (աղացած) — 450 գր
• սոխ — 1-2 գլուխ
• աղ — ըստ ճաշակի
• պղպեղ սև — ըստ ճաշակի
• սամիթ — 0,5 թ/գդ (չորացրած)
• բուսայուղ — տապակելու համար

Պատրաստման եղանակ

1. Խորը կաթսայի մեջ մաղում ենք ալյուրի անհրաժեշտ քանակությունը, ավելացնում աղը, 200 մլ ջուրն ու պատառաքաղով արագ խառնում մինչև գնդիկներ առաջանալը:
   Կարագը հալեցնում ենք, հասցնում եռման: Տաք վիճակում լցնում ենք խմորի վրա ու պատառաքաղով արագ խառնում: Ստացվում է շատ փափուկ, նուրբ խմորը, որը գնդում ենք, սննդային թաղանթով փաթաթում ու 1.5-2 ժամով դնում սառնարան:
   Խմորը բաժանում ենք 16-18 գնդի:
   
2. Մսին ավելացնում ենք աղացած սոխը, աղը, պղպեղը և սամիթը (ցանկության դեպքում կարող ենք նաև այլ համեմունքներ ավելացնել): Լավ խառնում ենք և ավելացնում 100-150 մլ սառցաջուրը (քանակը կախված է մսի տեսակից, արդյունքում խճողակը պետք է նոսր լինի): Եվս մեկ անգամ խառնում ենք:
   
3. Սեղանին ալյուր ենք ցանում, խմորի գնդերը բարակ գրտնակում, մեջը 1 ճ/գդ խճողակ դնում:
   
4. Ձևավորում ենք չեբուրեկին: Գրտնակած խմորի մի կողմը խճողակի վրայով բերում ենք, միացնում մյուսին: Ստացված կիսաշրջանի եզրերը պատառաքաղով սեղմում ենք:
   
5. Կաթսայի մեջ բավարար քանակությամբ բուսայուղ ենք լցնում, չեբուրեկները դնում մեջը և միջին ուժգնության կրակին տապակում՝ յուրաքանչյուր կողմը 2-4 րոպե:
   Դնում ենք ափսեի մեջ, տաք-տաք մատուցում:
   

Չեբուրեկի պատրաստելիս չմոռանաք մտերիմներին հյուր կանչել. նրանք ըստ արժանվույն կգնահատեն Ձեր ջանքերը 🙂