Դժվար է պատկերացնել ավելի մեծ հրաշք, քան այն, որ կնոջ սրտի տակ սկսում է զարկել մեկ այլ՝ փոքրիկ սիրտ: Այդ փոքրիկ սիրտն օրեցօր ավելի արագ է զարկում, և գալիս է մի գեղեցիկ օր, երբ մայրը կյանք է պարգևում իր փոքրիկին’ լույս աշխարհ բերելով նրան: Բայց ծնունդն իրականում բավական բարդ փորձություն է թե՛ փոքրիկի, թե՛ մոր համար:
Ծննդաբերությունը ֆիզիոլոգիական գործընթաց է, որով ավարտվում է հղիությունը: «Ծննդաբերության երկու տարբերակ կա’ օպերատիվ և բնական: Օպերատիվը կեսարյան հատումն է: Իսկ բնականը իրենց ուժերով ծննդաբերությունն է’ նորմալ ճանապարհով»,- LN-ի հետ զրույցում ասաց «Ռաֆայել» բժշկական կենտրոնի մանկաբարձ- գինեկոլոգ, սոնոգրաֆիստ Տաթևիկ Ղորուխչյանը: Կա նաև ծննդաբերություն ջրի մեջ տարբերակը, որը նույնպես բնական ճանապարհով ծննդաբերություն է: Այս տարբերակի միակ առավելությունը կնոջ մոտ ցավի գրեթե բացակայությունն է: Բայց, ինչպես նշեց գինեկոլոգը, այս տարբերակով ծննդաբերության ժամանակ դժվար է վերահսկել արնահոսությունը, ինչը շատ վտանգավոր է կնոջ առողջության համար: «Հայաստանում որոշ կլինիկաներում արդեն կիրառվում է ծննդաբերություն ջրի մեջ տարբերակը: Բայց պրակտիկան ցույց է տալիս, որ դա ավելի շուտ ձևական, գլամուր բնույթ է կրում»,- նկատում է գինեկոլոգ Տաթևիկ Ղորուխչյանը:
Ծննդաբերության ամենատարածված տարբերակներից մեկը կեսարյան հատումն է: Սա վիրահատություն է, երբ պտուղը դուրս է բերվում արգանդի վրա արհեստական կտրվածքից, ինչը, մանակաբարձ-գինեկոլոգի կարծիքով, այնքան էլ ընդունելի տարբերակ չէ. «Կեսարյան հատում պետք է արվի միայն այն դեպքում, երբ կա ցուցում’ կապված մոր կամ պտղի կյանքի հետ: Չնայած հիմա շատ դեպքերում կինն այդպես է ուզում, և այդպես էլ անում են, ինչը խստիվ հակացուցված է»:
Այս տարբերակն ընտրելիս պետք է իմանալ, որ կնոջ կյանքին ու առողջությանը սպառնացող վտանգը մի քանի անգամ ավելի մեծ է, քան բնական ճանապարհով ծննդաբերության ժամանակ: «Բնական ճանապարհով ծննդաբերության ժամանակ կնոջ ցավերը սկսվելուց մինչև ծննդաբերությունը կարող է տևել 10-16 ժամ կամ նույնիսկ մինչև մեկ օր : Դրանից էլ հնարավոր են դժվարություններ, պատռվածքներ և այլն: Ծննդաբերությունից հետո սկսվում է վերականգնման շրջանը: Կեսարյան հատման դեպքում հակառակն է: Կինը քնում է առողջ, զարթնելուց հետո սպի է լինում որովայնի, արգանդի վրա, սկսվում են ցավեր և այլ հետևանքներ»,- ասում է բժիշկը: Բացի կնոջից, կեսարյան հատումն ազդեցություն է թողնում նաև երեխայի վրա: «Կեսարյան հատման ժամանակ երեխան չի հասցնում պատրաստվել: Այն բոլոր փոփոխությունները, որ լինում են բնական ճանապարհով դուրս գալու դեպքում’ ֆիզիոլոգիայի հետ կապված փոփոխություններ, գլխի ձևի փոփոխություն և այլն, կեսարյան հատման ժամանակ տեղի չեն ունենում: Այսինքն՝ պտուղը կտրուկ փոխում է իր միջավայրը, որը սթրես է իհարկե»,- ասում է մանկաբարձ- գինեկոլոգ Տաթևիկ Ղորուխչյանը: Կեսարյան հատումը ծայրահեղ տարբերակ է, որին պետք է դիմել միայն բժշկի ցուցումով, երբ վտանգ է սպառնում մոր կամ պտղի կյանքին:
Կինն օժտված է ամենաաստվածային կարողությամբ’ կյանք պարգևելու: Պարգևեք Ձեր փոքրիկին առողջ կյանք’ առողջ մոր գրկում:
