Երգիչ Սարոն օրերս ներկայացրեց իր նոր՝ «Խոստանում եմ» տեսահոլովակը, որի հերոսուհին Լիա Զախարյանն է։ Վերջինս առաջին անգամ է նկարահանվում տեսահոլովակում, որը, ի դեպ, լի է սիրային անկեղծ տեսարաններով։
Տեսահոլովակում դերասանուհին ներկայանում է նոր կերպարով։ Tert.am Life–ի հետ զրույցում նա նշեց, որ իր համար դա փոքր-ինչ ռիսկային, բայց օրիգինալ առաջարկ էր, որին համաձայնել է առանց երկար մտածելու։
Լիան ասաց, որ մինչև նկարահանումների մեկնարկը մտավախություն ուներ, քանի որ տեսահոլովակում խոսք չկա, իսկ ինքը սովոր է այդ արտահայտչամիջոցին։ «Նախքան նկարահանումը շատ էի մտածում, թե ինչպես կանցնի այն, ինչպես եմ դրսևորելու ինձ։ Երբեմն, հայելու առաջ հայացքներ, ժպիտներ էի փորձում։ Ուզում էի սեր, ցանկություն արտահայտել հայացքով և հասկանալ` ինչպես է ստացվում, ինչպես է ճիշտ։ Նկարահանման օրը, աշխատելով ռեժիսորի հետ, ուշադիր լսելով իրեն և կենտրոնանալով, հունի մեջ ընկա։ Սա հետաքրքիր նորություն և փորձ էր ինձ համար»,– պատմեց երիտասարդ դերասանուհին։
Տեսահոլովակում բավականին շատ են սիրային անկեղծ տեսարանները։ Լիան նշեց, որ ամեն բան հեշտությամբ է ստացվել։ «Ամեն ինչ գործնական էր և մատուցվում էր պրոֆեսիոնալ մակարդակով։ Իմ առջև կար խնդիր` արտահայտել իրական, հասուն սեր, զգացմունք, ցանկություն, խենթություն, որը փորձեցի մատուցել դերասանական իմ մոտեցմամբ»,– ասաց նա։ Դիտարկմանը, որ տեսարաններն անկեղծ են, սակայն համբույր, որպես այդպիսին, չկա, դա ի՞ր պահանջն էր, Լիան արձագանքեց, որ համբույրի տեսարան, ի սկզբանե, չի եղել սցենարում։
Դերասանուհին չի վախենում, հնարավոր խոսակցություններից, որ կարող են ծավալվել։ Նա իր աշխատանքն էի արել։ «Վախենալու ոչինչ չունեմ։ Ես արվեստի մեջ գործունեություն ծավալող դերասանուհի եմ։ Սա աշխատանք է, և ես փորձում եմ հնարավորինս պրոֆեսիոնալ մոտեցում ցուցաբերել իմ աշխատանքին` հանրությանը մատուցելով բնական և լուրջ դերասանական աշխատանք»,– նկատեց նա։
Անդրադառնալով Սարոյի հետ աշխատանքին` Լիան նշեց, որ երգչի հետ համագործակցելը բավականին հեշտ էր։ «Բացի այն, որ նա պրոֆեսիոնալ երգիչ է, նաև շատ լավ խաղընկեր է, ում հետ աշխատեցի առանց կոմպլեքսների և դժվարությունների։ Ամեն ինչ այնքան պրոֆեսիոնալ էր կազմակերպված, այնքան մոտ էր իրականին, որ տեսարաններում իրական զգացողությանը մոտ էինք աշխատում»,– նշեց Լիան։
Աղբյուր՝ Tert.am Life
